Ош облусунун Алай районунда жеке менчикке мыйзамсыз берилген жер мамлекетке кайтарылып, эки жетим балага берилди. Бул тууралуу Башкы прокуратурадан билдиришти.
Маалыматка ылайык, Гүлчөнүн айыл өкмөтү 2021-жылы 22-декабрда 8,36 сотых жер тилкесин мыйзам бузуу менен бир жаранга бөлүп берген. Прокуратура ал боюнча сотко кайрылып, жер муниципалдык менчикке кайтарылган.
Андан кийин прокуратура аталган жерди 4 сотыхтан экиге бөлүп, Гүлчөдөгү эки томолой жетим балага үй куруу үчүн берүү сунушу менен жергиликтүү бийликке кайрылган.
Жыйынтыгында 16 жаштагы М.Р. жана 17 жаштагы А.Г. аттуу эки томолой жетим бала 4 сотыхтан жер алган.
