Билим берүү жана илим министрлиги окуу жылынын башталышын 1-сентябрдан тарта кайтаруу мүмкүнчүлүгүн изилдеп жатат. Бул тууралуу аталган министрликтин басма сөз кызматы билдирди.
Маалыматка ылайык, аларга ата-энелерден жана мугалимдерден окуу жылынын эски тартибине кайтуу боюнча көптөгөн арыздар жана сунуштар түшүп жатат.
«Азыр бул маселе министрликтин бөлүмдөрүндө каралып жатат», — деп билдирди басма сөз кызматы.
Бөлүм окуу жылынын эски графигин кайтаруу мүмкүнчүлүгүн жокко чыгарбайт, бирок азырынча алар качан чечим кабыл алынарын айта алышпайт.
Эске салсак, буга чейин change.org сайтында 1-сентябрдан окуу жылын кайтаруу боюнча петиция жарыяланган. Билим берүү министрлиги мектептерде сурамжылоо жүргүзүп, андан соң маселени талкуулоону көздөп жатышканын белгиледи.
