Министрлер кабинети Кыргызстанда жетим балдарды асырап алуу жеңилдетүү саясатын баштайт. Бул тууралуу бүгүн, 12-мартта өткөн Жогорку Кеңештин жыйынында Министрлер кабинетинин төрагасынын орун басары Эдил Байсалов билдирди.
Анын айтымында, өлкөдө жетим балдарды асырап алууда эрежелер — абдан катаал. Мындан улам алар бала багып алууну каалап, кезекте турган 600-700 үй-бүлөгө балдарды бере албай жатышат.
«Мисалы, Орусиядан да 3-6 айлык, 1 жашар балдар келет. Багып алам дегендерге бербей, аларды 3-4 жашына чейин кармап атабыз. Жакында президентибиздин чечими менен дебюрократизация боюнча атайын министр Баетов дайындалды. Ошондо дагы биз ушул балдарды тезинен убактылуу фостердик үй-бүлөгө өткөзөбүз. Негизги саясат ошондой болгону турат»,- деп билдирди ал.
