Бишкектин Биринчи май райондук сотунун судьялары 24-октябрь күнү кечинде массалык баш аламандык уюштурууга аракет кылган деген шек менен бир күн мурун кармалган активисттерге жана саясатчыларга бөгөт коюу чарасын карады.
Соттун чечими менен эки айга камалгандар:
— Конституциялык соттун экс-судьясы Клара Сооронкулова,
— БШКнын экс-мүчөсү Гүлнара Журабаева,
— Экс-элчи Азимбек Бекназаров,
— Жогорку Кеңештин экс-депутаты Равшан Жеенбеков,
— Жогорку Кеңештин экс-депутаты Асия Сасыкбаева,
— Жогорку Кеңештин экс-депутаты Кубанычбек Кадыров,
— Коопсуздук кеңешинин экс-катчысы Кеңешбек Дүйшебаев,
— Жалал-Абад облусунун экс-губернатору Бектур Асанов,
— активист Эрлан Бекчороев,
— саясатчы Жеңиш Молдокматов,
— активист Перизат Суранова,
— активист Рита Карасартова,
— блогер Али Шабдан,
— активист Таалай Мадеминов,
— активист Улугбек Маматаев,
— өкмөттүн Талас облусундагы мурдагы ыйгарым укуктуу өкүлү Айбек Бузурманкулов,
— активист Нурлан Асанбеков,
— активист Чыңгыз Капаров,
— жарандык активист Айданбек Акматов.
Баары Бишкек шаарындагы СИЗО-1ге 20-декабрга чейин жайгаштырылды. Азимбек Бекназаровдун камактагы мөөнөтү 23-декабрга чейин деп белгиленди. Кармалгандар соттун чечимине нааразы.
Эске салсак, 22-октябрда Кемпир-Абад суу сактагычын колдоо комитети түзүлгөн. Анын курамына активисттер, саясатчылар жана депутаттар кирген. 23-октябрда массалык тинтүү иштери башталып, 20дан ашык адам кармалып, алар 48 саатка камалган.
24-октябрда Бишкек шаарында Кемпир-Абад суу сактагычынын астындагы жердин Өзбекстанга берилишине жана активист, саясатчылардын камалышына каршы жөө жүрүш өткөн.
Активист жана саясатчылардын камалышы боюнча ИИМ түшүндүрмө берип, Кылмыш-жаза кодексинин 36-278-беренеси «Массалык баш аламандыктарды уюштурууга даярдануу» менен козголгон кылмыш иши боюнча тергөө амалдары жүргүзүлүп жатканын билдирген.
Биздин Телеграм каналыбызга катталыңыз
