КР Эмгек, социалдык камсыздоо жана миграция министрлиги 2026-жылдагы Жаңы жылдык майрамдарды кыйла узарта турган токтом долбоорун коомдук талкууга чыгарды. Мекеме 1-январдан 11-январга чейин (кошо алганда) эс алуу күндөрү кылууну сунуштоодо.

Жаңы Эмгек кодексинин ченемдерине ылайык, Кыргызстандын жарандары ансыз деле 1-январдан 7-январга чейин эс алууга укуктуу. Бирок, 2026-жылы 8 жана 9-январь бейшемби жана жума күндөрүнө туш келгендиктен, министрлик жуманы ортодон бөлбөй, бул жумуш күндөрүн жылдырууну туура деп тапкан.

Эс алуу күндөрү кандай жылдырылат:

• 8-январь (бейшемби) жумуш күнү 7-февраль ишембиге;
• 9-январь (жума) жумуш күнү 25-апрель ишембиге жылдырылат.

Эгер Министрлер кабинети бул сунушту бекитсе, кыргызстандыктар удаасы менен 11 күн эс алып, жумушка 2026-жылдын 12-январында гана чыгышат.