10-январь Казакстанда Улуттук аза күтүү күнү деп жарыяланды. Бул тууралуу жергиликтүү маалымат каражаттары жазып чыгышты.
Мындай чечимди президент Касым-Жомарт Токаев бир катар аймактарда болгон кайгылуу окуялардын натыйжасында көп сандаган адам курмандыгына байланыштуу кабыл алганы такталган.
Казакстанда массалык нааразылык акциялары 2022-жылдын алгачкы күндөрүндө башталган. Мангистау облусунун Жаңы-Өзөн жана Актау тургундары суюлтулган газдын кымбатташына каршы чыгышып, андан соң нааразылык акциялары башка шаарларга да жайылган. Өлкөнүн шаарларында абал акырындык менен турукташууда. Интернетке кирүү калыбына келтирилди.
Президент Касым-Жомарт Токаев республикага өзгөчө кырдаал киргизип, өкмөттү отставкага кетирип, Коопсуздук кеңешин жетектеди. Анын өтүнүчү менен ЖККУ өлкөлөрү Казакстанга бейпилдик күчтөрүн жөнөткөн. Ал жакка Кыргызстандан “Скорпион” атайын күчтөрү жөнөтүлгөн.
