Жогорку соттун мурдагы төрагасы, Кыргызстанга эмгек сиңирген юрист Качкынбай Бообеков каза болду. Бул тууралуу Жогорку соттун басма сөз кызматы билдирди.
Маалыматка ылайык, Качкынбай Бообеков узакка созулган оорудан улам 25-июлда 83 жашында дүйнөдөн кайтты.
Качкынбай Бообеков 1937-жылдын 1-январында Чүй облусунун Кемин районундагы Боролдой айылында төрөлгөн. 1965-жылы Кыргыз мамлекеттик университетин аяктаган.
1989-жылга чейин Кемин райондук сотунда катчы, Ош облустук сотунда судья, Балыкчы шаардык сотунда судья, төрага, Нарын облустук сотунун төрагасынын орун басары, Ысык-Көл облустук сотунун төрагасынын орун басары болуп эмгектенген.
1991-жылы Жогорку соттун төрагалыгына шайланып, 1995-жылга чейин жетектеген. Качкынбай Бообеков Кыргызстан эгемендик алгандан кийинки Жогорку соттун алгачкы төрагасы болуп эсептелет.
Ал 1996-2002-жылдары Бишкек шаарынын Свердлов райондук сотунун төрагасы болуп иштеген. 2002-2007-жылдары Жогорку соттун судьясы болгон.
