2026-жылдын 13-январында бир троя унциясы (салмагы 31,1035 грамм) алтынды кайра сатып алуу баасы жаңы тарыхый жогорку чекке жетти. Бул тууралуу КР Улуттук банкынын статистикалык маалыматтары тастыктайт.

Жөнгө салуучу органдын расмий маалыматына ылайык, бүгүн банк калктан бир унция алтынды сатып алууга даяр болгон баа 405 миң 541 сомду түздү. Бул мурунку күндүн көрсөткүчүнө караганда (12-январь — 395 миң 96,5 сом) 10 миң 444,5 сомго көп.

Баанын мындай кескин өсүшү 2025-жылдын 26-декабрында катталган мурунку рекордду жаңылады. Ал кезде кайра сатып алуу баасы 394 миң 400 сомду түзгөн эле.

Кыргызстанда баалуу металлдын тез кымбатташы дүйнөлүк рыноктогу кырдаал менен шартталган. Бүгүнкү күндө алтындын дүйнөлүк котировкасы бир унция үчүн 4 миң 600 АКШ доллары чегине жетти. Расмий курс менен улуттук валютага которгондо, бул сумма болжол менен 402 миң 270 сомго барабар.