Кыргызстандын улуттук курамасынын оюнчусу Гүлжигит Алыкулов кийинки сезондо Орусиянын премьер-лигасында ойнойт. Бул тууралуу Sputnik Кыргызстан агенттиги жазып чыкты.
Кыргызстандык оюнчу ойноп жаткан Москва шаарындагы «Торпедо» клубу Биринчи лигада экинчи орунду ээлеп, орус футболунун жогорку дивизионуна чыккан.
«Торпедо» командасы акыркы ирет Орусия премьер-лигасында 2022/2023-жылкы сезондо ойногон.
Гүлжигит Алыкулов «Торпедо» клубуна январь айында кошулган. Москва клубу менен келишими 2027-жылдын аягына чейин түзүлгөн.
