Балык чарба комплекси департаменти спорттук жана сүйүүчүлүк балык уулоого расмий түрдө тыюу салды. Чектөө чаралары республиканын көлдөрүндө, дарыяларында жана суу сактагычтарында балыктардын көбөйүү мезгили аяктаганга чейин күчүндө болот.

Бекитилген графикке ылайык, Ысык-Көлдө чебакты уулоого тыюу салынды, ал 15-майга чейин уланат. Бул мезгилде аймакта электрондук балык уулоо билеттерин берүү да токтотулду. Андан ары чектөөлөр ысык-көл чебачогуна (1-майдан 1-июлга чейин) жана карп-сазанга (15-майдан 15-июлга чейин) тиешелүү болот.

Өлкөнүн калган көлдөрүндө, көлмөлөрүндө жана дарыяларында алабуга, чабак (лещ), карась жана плотва сыяктуу балыктардын майда түрлөрүн 15-апрелден 5-июнга чейин кармоого тыюу салынат. Жаян, көк серке (судак), чортон балык (щука), сазан жана амурду кошкондогу ири түрлөргө 5-майдан 20-июнга чейин чектөө белгиленген. Дарыядагы маринканы кармоо 15-майдан июлга чейин тыюу салынат.

Дарыялардагы баалуу жана лимиттелген түрлөр үчүн өзүнчө регламент каралган. Дарыя османын уулоого июнь жана июль айларында тыюу салынган. Форелге карата тыюу кийинчерээк күчүнө кирет: ысык-көл форели үчүн — 1-октябрдан тартып, ал эми амударыя форели үчүн — үстүбүздөгү жылдын 15-октябрынан тартып.