Бишкекте көп кабат үй куруп жаткан «Беш Сары» компаниясына 200 миң сом айыппул салынды. Бул тууралуу Архитектура, курулуш жана турак жай-коммуналдык чарба мамлекеттик агенттигинен билдиришти.

Ахунбаев менен Тыналиев көчөлөрүнүн кесилишинде салынып жаткан үйдү текшерүү учурунда имараттын жүк көтөрүүчү каркасында, тосмо конструкцияларында, чатырында көптөгөн мыйзам бузуулар аныкталган. Ага байланыштуу компанияга 200 миң сом айып салынып, бардык аныкталган мыйзам бузууларды четтетүү тапшырылган. Кемчиликтер жоюлганга чейин курулуш-монтаждоо иштери токтотулду.

Эскерте кетсек, «Беш Сары» компаниясы Жогорку Кеңештин мурдагы депутаты Камчыбек Жолдошбаев тарабынан негизделген. Учурда компанияны анын кызы Наргиза Жолдошбаева жетектейт.