Кечээ, 3-февралда Нарын шаарында жеңил автоунаа 10 жаштагы окуучу кызды өлтүрө сүзүп кетти. Маалыматты облустук Жол кыймылынын коопсуздугун камсыздоо башкармалыгынан билдиришти.
Такталгандай, кырсык 3-февраль күнү саат 15:20 чамасында шаардын Городок аймагында болгон.
33 жаштагы У.М. аттуу тургундун башкаруусунда бара жаткан «Фольксваген Венто» үлгүсүндөгү автоунаа 2010-жылы туулган окуучу кызды сүзүп алган. Жабырлануучу ооруканага жеткирилип, бирок алган жаракатынан улам каза болгон.
Бул факты Кылмыштардын жана жоруктардын бирдиктүү реестрине катталып, сотко чейинки тергөө иштери башталган.
