Унаасы камсыздандырылбаган (ОСАГОсу жок) жарандарга 2025-жылдын 1-июлунан тарта айыппул салына баштайт. Тиешелүү токтом өкмөт тарабынан кабыл алынды.
Буга чейин ОСАГОсу жокторго 1-январдан тарта айып салына турган болгон. Бирок айдоочулардын көбү ОСАГО ала элек болгондуктан, Экономика министрлиги айыппул 1-июлдан тарта салынсын деген сунуш киргизген.
Унаасы камсыздандырылбаган жарандарга 3 миң сом айыппул каралган.
Каржы рыногун жөнгө салуу кызматы белгилегендей, аталган норма компания-ишканалар, анын ичинде мамлекеттик органдар, жергиликтүү бийлик, ошондой эле чет өлкөлүк (чет жакта катталган) унаалар үчүн 2023-жылдын 1-апрелинен бери иштеп келет. ОСАГОсу жок болгону үчүн аларга 13 миң сом айыппул каралган.
