Оштун Кара-Суу районунда терминалдан акча уурдоого шектүү кармалды. Бул тууралуу облустук милициядан билдиришти.
Маалыматка караганда, былтыр 30-ноябрга караган түнү белгисиз адамдар Отуз-Адыр айыл аймагында дүкөндүн дубалын бузуп кирип, анын ичиндеги товарларды жана терминалдан 85 миң сомду уурдап кеткен. Бул окуя боюнча дүкөндүн ээси милицияга кайрылган.
Бул фактыга байланыштуу Кылмыш-жаза кодексинин 205-беренеси (уурдоо) боюнча кылмыш иши козголгон.
Ыкчам-издөө иштеринин натыйжасында шектүү катары 36 жаштагы А.Н. аттуу жаран Бишкекте жашынып жүргөн жеринен кармалган. Ал камакка алынган.
Тергөө амалдарынын жүрүшүндө шектүү дагы 2 шериги бар экени жана алар Чүйдүн Сокулук районундагы башка уурулук фактылары боюнча кармалганы аныкталган.
Милициядан билдиришкендей, аталган шектүүлөр Отуз-Адырдагы 2 дүкөнгө кирип, терминалдарды бузуп, алардагы акчаларды алып кетишкен. Ошондой эле алар кылмышын жашыруу үчүн дүкөндөрдөгү видеобайкоо камералардын маалымат сактаган дискин чыгарып алып, аны сууга ыргытып жиберген.
Учурда тергөө амалдары уланууда.
