Дене тарбия жана спорт агенттиги көк бөрү оюнуна толугу менен тыюу салынбагандыгын билдирди.
Маалыматта айтылгандай, ушул жылдын март айында Нооруз майрамын белгилөө үчүн пландаштырылган көк бөрү оюну боюнча салттуу иш-чараны убактылуу токтотуу чечими кабыл алынган.
Агенттик көк бөрү оюну кыргыз эли үчүн чоң мааниге ээ экенин түшүнөрүн, бирок спортчулардын ден соолугу жана коопсуздугу көбүрөөк маанилүү деп эсептээрин билдирген. Ошондой эле кабыл алынган чечимге түшүнүү менен мамиле кылууну өтүнгөн.
«Жакынкы арада Мамлекеттик агенттик Көк бөрү федерациясы менен биргеликте кызматташуу келишимине кол коюу маселесин иштеп чыгат, анда жоопкерчилик тууралуу нормалар так жазылат. Мындан тышкары көк бөрү боюнча калыстарды жана оюнчуларды жаңы эрежелерге окутуу пландаштырылууда»,- деп айтылат маалыматта.
Эске салсак, 12-мартта Бишкектин четиндеги «Ак-Кула» ат майданында Нооруз майрамына карата уюштурулган көк бөрү оюну учурунда улакчы каза болгон. Бул окуядан кийин Ноорузга карата уюштурулган мелдеш токтотулган эле.
