Министрлер кабинетинин төрагасынын орун басары Камчыбек Ташиев мектептерде жарыкты кечки саат 19:00гө чейин өчүрбөөнү талап кылды. Ал кечки маалда окуган окуучулар сабактан кийин коопсуз түрдө мектептен чыга алышы керектигин белгиледи.

«Мектептерде саат 18:00дөн кийин жарыкты өчүрүү туура эмес. Үнөмдөө башка жерлерде болсун, бирок балдар билим алган жерде эмес. Экинчи сменада окуган окуучулар ата-энелерин табууга жана коопсуз үйүнө кайтууга жетишиши керек, ал эми караңгыда бул мүмкүн эмес», — деди Ташиев «Регион» телеканалына берген маегинде.

Буга чейин Агартуу министрлиги өлкөдөгү электр энергиясынын тартыштыгына байланыштуу билим берүү мекемелеринде энергияны үнөмдөө чаралары киргизилгенин билдирген.

Ошол эле учурда Ташиев Кыргызстанда жарыкты кезектеп өчүрүү болбой турганын баса белгиледи.

«Эч ким атайылап жарыкты өчүрбөйт. Кудай буйруса, электр энергиясы жетет. Бирок аны сарамжалдуу колдонолу, жөн эле коротпойлу. Ооба, быйыл суу аз болуп, электр энергиясын өндүрүү азайды, бирок биз кышты ийгиликтүү өткөрүү үчүн бардык чараларды көрөбүз. Тынчсызданбагыла», — деди Ташиев.