Кыргызстандын Ички иштер министрлигинин Тергөө кызматы “Жеңиш” чокусунда кырсыкка кабылган россиялык альпинист Наталья Наговицына боюнча тергөөгө чейинки текшерүү баштады. Бул тууралуу ведомствонун маалымат кызматынан билдиришти.

Маалыматка ылайык, 12-августтан бери Наговицына 7 100 метр бийиктикте бутунан жаракат алган бойдон калган. Айрым булактарда анын каза болгондугу мүмкүн экени тууралуу да айтылууда.

Бул факты ИИМдин “Маалыматтарды каттоо журналы” автоматташтырылган маалыматтык тутумуна катталган.

Министрлик текшерүүнүн алкагында чокуга чыгууну уюштурган туристтик компаниянын ишмердүүлүгүнө да юридикалык баа берилерин кошумчалады.