Жалал-Абад облусунун Базар-Коргон районунда Акман айыл өкмөтүнүн жаңы конушунун бирине экс-муфтияттын башчысы Чубак ажы Жалиловдун ысымын ыйгаруу чечими кабыл алынды. Бул тууралуу Кыргызстан мусулмандарынын дин башкармалыгынын (КМДБ) маалымат кызматы билдирди.

Ошондой эле айылдагы Чубак ажы атындагы мечиттин жана медресенин курулушуна капсулалар салынды.

Жаңы конушка маркум диний аалымдын ысымын ыйгаруу демилгесин жергиликтүү тургундар көтөрүшкөн.

Мечит менен медресе куруу үчүн жерди жергиликтүү айыл тургуну бөлүп берген.

Муфтият белгилегендей, курулуш Бүткүл дүйнөлүк жаштар ассамблеясы тарабынан каржыланат. Демөөрчүлөрдүн бири фельдшердик-акушердик пункттун курулушун да каржылап берүүнү убада кылды.

• Кыргызстандык диний аалым, маркум  Чубак ажы Жалилов 2010-2012-жылдары Кыргызстан мусулмандарынын дин башкармалыгынын жетекчиси болгон. Ал Базар-Коргон районунун Баймундуз айылында төрөлүп, 2020-жылдын 11-июлуна караган түнү Бишкек шаарында каза болгон.

 Телеграм каналыбызга катталыңыз