Былтыр “Кумтөрдөгү” текшерүүнүн жыйынтыгы менен 5 млрд сомго жакын каржылык бузуу болгону аныкталды. Бул тууралуу  бүгүн, 24-январда Жогорку Кеңештин Конституциялык мыйзамдар, мамлекеттик түзүлүш, сот-укук маселелери боюнча комитетинин жыйынында Эсептөө палатасынын төрагасы Алмазбек Акматов билдирди.

Жыйында депутат Мейкинбек Абдалиев былтыр “Кумтөрдөгү” текшерүүнүн жыйынтыгы кандай болгонун сурады.

Акматовдун айтымында, текшерүү 5 млрд сомго жакын каржы бузууларды аныктаган.

“Кумтөрдүн мурдагы жетекчилери түзгөн бухгалтердик система, бөлөк системанын баары өзгөрүлгөн эмес экен. Ошондой эле уланып жатыптыр. Биздин текшерүүнүн жыйынтыгы менен 5 млрд сомго жакын каржы бузуулар аныкталган”, – деди ал.

Ал билдиргендей, бул иш боюнча ИИМ, Башкы прокуратура жана УКМК териштирүү жүргүзүүдө.

Депутат Абдалиев, аталган факт “Теңгиз Бөлтүрүктүн ишиби?” деп сурады.

“Ооба, ошол кишинин иши”, – деди Акматов.

Эскерте кетсек, «Кумтөр Голд Компани» жабык акционердик коомунун мурдагы тышкы башкаруучусу Теңгиз Бөлтүрүк былтыр сентябрь айында кармалган. Учурда ал УКМКнын тергөө абагында камакта отурат. Анын камактагы мөөнөтү 10-мартка чейин узартылган.

Башкы прокуратура Теңгиз Бөлтүрүк менен бирге эки кишини «Кумтөр Голд Компанидеги» коррупциялык ишке шектеп кармаган. Мамлекетке 1 млрд сомго жакын зыян келтирилгени айтылган.

“Кумтөр Голд Компанинин” мурдагы аткаруучу директоруна издөө жарыяланды

Биздин Телеграм каналга катталыңыз