Президент Садыр Жапаров бүгүн, 23-июнда Мамлекеттик жана муниципалдык кызматкерлерин кесиптик майрамы менен куттуктады. Бул тууралуу президенттин басма сөз кызматы билдирди.
Төмөндө мамлекет башчысынын куттуктоосу:
“Урматтуу мамлекеттик жана муниципалдык кызматкерлер!
Сиздерди кесиптик майрамыңыздар менен чын дилимден куттуктаймын! Мамлекеттик түзүлүштүн туруктуу өнүгүшүндө жана калкка кызмат кылууда мамлекеттик жана муниципалдык кызматчылардын эмгеги зор.
Сиздердин чаалыкпаган иш-аракетинин негизинде эл-журтубузга ыкчам жана ыңгайлуу кызмат көрсөтүүнүн сапаты жакшырып барат.
Бүгүнкү күндө кадр маселеси өлкө жетекчилигинин көңүл чордонунда. Мамлекеттин маанилүү багыттарынын бири катары кадр саясатындагы ачык-айкындуулукту камсыз кылуу, элдин ишенимин арттыруу жаатында кадрларды түзүлгөн резервден дайындоо, ротация кылуу сындуу алгылыктуу чаралар көрүлүп келе жатат.
Үстүбүздөгү жылы коомго ак ниет кызмат кылууга, мамлекеттин алдына коюлган милдеттерди аткарууга багытталган натыйжалуу кесипкөй кадрдык аппаратты түзүү максатында 2023-2025-жылдары Кыргыз Республикасында кадрларды өнүктүрүүнүн жана түзүүнүн мамлекеттик стратегиясы кабыл алынып, ишке кирди.
Келечекте бул документ аркылуу укуктук, уюштуруучулук жана социалдык институт катары мамлекеттик жарандык жана муниципалдык кызмат системасын калыптандырууга жана натыйжалуу иштетүүгө жетишебиз. Анын негизинде кесипкөй, компетенттүү, кабыл алынган чечимдер жана иштин натыйжалары үчүн жоопкерчилик ала алган, этика стандарттарын бекем сактаган адистерди өстүрүп чыгууга жол ачылат.
Тармактык кызматкерлерибиз санариптештирүү жана башка заманбап технологияларды колдонуу менен калкты тейлөө, документ жүргүзүү жана кызмат көрсөтүүлөрдү жеңилдетүү аракетин тынбай көрүп келишүүдө. Коомчулуктун суроо-талабын канааттандырууда кесипкөйлүк, компетенттүүлүктөн сырткары, жогорку руханий-адептүүлүк сапаттарга да ээ болууга умтулушууда.
Урматтуу мамлекеттик жана муниципалдык кызматкерлер!
Сиздердин мына ушундай ак ниет кызматыңыздардын аркасында мамлекеттик жана муниципалдык кызматкерлерге ишеним арткан өнүккөн мамлекетти курууга жетишебиз.
Баарыңыздарга бекем ден соолук, берекелүү өмүр, ишиңиздерге моюбас жигер жана Жараткан адамзатка ыроологон бардык жакшылыктарды каалайм!”
Бардык жаңылыктар Телеграм каналда
