Нарындын Жумгал районунда дайынсыз жоголгон ата-баланы издөө иштери улануда. Бул тууралуу Өзгөчө кырдаалдар министрлигинен билдиришти.
Бүгүн, 4-ноябрда издөөгө жалпы 56 адам чыккан, алардын арасында куткаруучулар, милиция кызматкерлери жана жергиликтүү тургундар бар. Издөө иштеринде 4 дрон колдонулууда.
Эскерте кетсек, Жумгалдын Өрнөк айылынын 49 жаштагы тургуну Болот Карыпбеков менен 9 жаштагы уулу 16-октябрда кой кезүүгө кетип, кийинчерээк байланышка чыкпай калышкан. ӨКМ билдиргендей, ата-баланын дайынсыз болуп жатканы тууралуу аларга 19-октябрда кабарланган. Издөө иштери ошол күнү башталып, ата-бала азыркыга чейин табыла элек.
Алардын атынын өлүгү Көкөмерендин жээгинен табылгандыктан, ата-бала сууга агып кеткен деп болжолдонууда.
