Бишкектин борборунда жер алдындагы жылуулук кууру жарылды. Бул тууралуу «Бишкек жылуулук тармактары» ишканасы билдирди.
Маалым болгондой, жарылган түтүк Киев көчөсүндө Турусбеков менен Исанов көчөлөрүнүн ортосунда жайгашкан. Учурда ишкананын оңдоо бөлүмүнүн кызматкерлери түтүктүн жарылган жерин таап, анын канчалык жабыркаганын аныктоодо. Ишкана аталган иштерге карабай шаар тургандарында жылуулук өчүрүлбөй турганын билдирди. Бирок Бишкектин борбордук бөлүгүндө жылуулук менен ысык суунун температурасы түшүшү мүмкүн.
Ишкана аталган куур 1965-жылы салынганын, эскилиги жеткенин жана аны жаңылоого убакыт келгенин белгилейт.
