«Кыргызстан үчүн, ошондой эле транзитке көз каранды башка өлкөлөр үчүн бул программаны ишке ашыруу инфраструктураны жакшыртууга, каржылоого жеткиликтүүлүктү кеңейтүүгө жана регионалдык кызматташууну бекемдөөгө өбөлгө түзөт», — деп баса белгиледи Адылбек Касымалиев. Мисал катары ал «Кытай – Кыргызстан – Өзбекстан» темир жолунун курулушун келтирди, ал бүтүндөй аймак үчүн жаңы соода-экономикалык мүмкүнчүлүктөрдү ачат.

Өз кезегинде Антониу Гутерриш Кыргызстанды эл аралык транспорт-логистикалык байланыштарды өнүктүрүүгө кошкон салымы үчүн жогору баалап, Борбор Азиядагы чек ара маселелерин чечүү чечимин кубаттады. Министрлер Кабинетинин төрагасы ошондой эле БУУнун Башкы катчысынын көңүлүн мөңгүлөрдүн эриши менен байланышкан климаттык коркунучтарга буруп, 2027-жылы өтө турган «Бишкек+25» эл аралык саммитине даярдык тууралуу айтып, БУУнун активдүү катышуусуна үмүт билдирди.

Конференциянын алкагында Түркмөнстан Президенти Сердар Бердымухамедов менен маанилүү эки тараптуу жолугушуу болуп өттү. Адылбек Касымалиев Кыргыз Республикасынын Президенти Садыр Жапаровдун саламын жеткирип, өлкөлөр ортосундагы товар жүгүртүүнүн туруктуу өсүшүн белгиледи. Кыргыз тарап логистика тармагында кызматташууну жана транзиттик мүмкүнчүлүктөрдү пайдаланууну кеңейтүүгө кызыкдар экенин баса белгиледи. Мындан тышкары, Министрлер Кабинетинин төрагасы Непалдын Премьер-министри Кхадга Прасад Шарма Оли жана Ливия Президенттик кеңешинин төрагасы Мохаммед Юнис Ахмед Аль-Менфи менен да сүйлөшүүлөрдү өткөрдү.

Сапар «Аваза» туристтик аймагындагы маданий иш-чаралар менен жыйынтыкталды. «Борбор Азия өлкөлөрүнүн улуттук күндөрү» алкагында Адылбек Касымалиев башка делегация жетекчилери менен бирге маданий иш-чараларга катышты. Кыргызстан улуттук боз үйдү салттуу жасалгасы менен, элдик кол өнөрчүлүк буюмдарын камтыган этно-стендди тааныштырып, мастер-класстар өткөрүп, конокторду улуттук аш-суулар менен коноктоду.