АКШнын президенти Дональд Трамп Ирандын портторуна кирген жана андан чыккан бардык кемелердин деңиз блокадасы күчүнө киргенин ырастады.

«Ооба, ал саат 10.00дө башталды. Америкалык аскерлер бул каттамды колдонууга аракет кылган бардык кемелерди токтотот», — деди Трамп Ак үйдө журналисттерге.

Ал ошондой эле кысыктан өткөндүгү үчүн Иранга акча төлөгөн танкерлерди көзөмөлдөө жана кармоо боюнча тапшырма бергенин кошумчалады.

Эскерте кетсек, АКШнын Куралдуу күчтөрүнүн Борбордук командачылыгы (CENTCOM) дүйшөмбү күнү Ормуз кысыгын бөгөттөөнү баштаган. Ошол эле учурда сөз Ормуз кысыгы бириктирип турган Перс жана Оман булуңдарындагы порттор жөнүндө болуп жатканы белгиленген. Улуу Британиянын Деңиз соода операциялары башкармалыгы (UKMTO) кемелер Ирандын бүткүл жээгин толук бөгөттөө башталганы тууралуу билдирмелерди алганын маалымдады.

Белгилей кетсек, Ак үйдүн башчысы Ормуз кысыгындагы америкалык блокаданын түпкү максаты — Тегеранды сүйлөшүү үстөлүнө кайтаруу жана бензиндин баасы төмөндөшү үчүн кысыктарды ачуу деп ырастоодо.

«Экөө тең — сөзсүз, муну менен гана чектелбейт», — деп кошумчалады Трамп.

Өз кезегинде Ирандын президенти Масуд Пезешкиан Франциянын лидери Эммануэль Макрон менен телефон аркылуу сүйлөшүүсүндө АКШнын Ормуздагы коркутуулары соодага терс таасирин тийгизерин эскертти.

«Бул аймактын коопсуздугуна карата ар кандай коркунучтар дүйнөлүк соода үчүн масштабдуу кесепеттерге алып келет. Бирок Иран Ормуз кысыгындагы кырдаалга байланыштуу ар кандай сценарийлерге даяр», — деп келтирет Пезешкиандын сөзүн анын басма сөз кызматы.

Буга чейин, 11-апрелде Трамп 8-апрелге караган түнү Тегеран менен эки жумага ок атышууну токтотуу боюнча макулдашууга жетишкенин билдиргенден кийин, Исламабадда (Пакистан) Иран менен АКШ сүйлөшүүлөрдү баштаган. Бирок 12-апрелде эртең менен америкалык делегацияны жетектеген вице-президент Жей Ди Вэнс тараптар макулдашууга келе албаганын билдирген.

Кийинчерээк Трамп АКШ Ормуз кысыгына кирүүгө жана андан чыгууга аракет кылган бардык кемелерди бөгөттөөнү баштай турганын жарыялаган.