Президент Садыр Жапаров Москва шаарында жакын арада Кыргызстандын Илим жана Маданият Үйү ачыларын билдирип, бул кадам эки мамлекеттин маданий байланышын мындан ары да чыңдоого өбөлгө түзөрүн баса белгиледи.

Бул тууралуу ал «Ынтымак Ордодо» Россия Федерациясынын президенти Владимир Путиндин Кыргыз Республикасына мамлекеттик сапарынын алкагында өткөн кеңири курамдагы сүйлөшүүлөрдө айтты.

Жапаровдун айтымында, Кыргызстан менен Орусиянын элдеринин ортосундагы маданий кызматташтык акыркы жылдары активдүү өнүгүп, кеңейүүдө. Эки өлкөдө өткөн маданият күндөрү ийгиликтүү өтүп, көрүүчүлөрдүн зор кызыгуусун жаратты.

Жапаров Кыргызстандын Илим жана Маданият Үйүнүн Москвада ачылышы маданий алакаларды тереңдетүүгө олуттуу салым кошорун белгилеп, бул демилгеге иш жүзүндө колдоо көрсөткөн россиялык тарапка ыраазычылык билдирди.