Ош шаарындагы күйүп кеткен көп кабаттуу үй толугу менен калыбына келтирилди. Бул тууралуу шаар мэриясы билдирди.

26-ноябрда оңдолгон батирлерди ээлерине тапшыруу аземи болуп өттү. Ага мэр Жеңишбек Токторбаев, шаардык кеңештин төрагасынын орун басары Ныязбек Нурбаев жана жашоочулар катышкан.

Мэр өлкө башчы Садыр Жапаровдун атынан 2 лифт, ал эми өрттөнгөн 6 батирдин ар бирине муздаткыч жана кир жуучу машиналарды тапшырган. Ошондой эле Ош мэриясы тарабынан да 2 лифт орнотулуп берилген.

Эске салсак, 19-октябрда таңга маал Маматисаков көчөсүндө жайгашкан көп кабаттуу турак үйдүн чатырынын чоң өрт чыккан. Өрттүн кесепетинен үйдүн 1 миң 800дөн ашык чарчы метр жери (6 батир) күйүп кеткен. Тургундар жабыркаган эмес.

Кырсыктан кийин мэр Жеңишбек Токторбаев билдирүү жасап, үйдүн чатырын жана жабыркаган батирлерди мэрия толук калыбына келтирип берерин билдирген.