Бүгүн, 14-апрелде, Жогорку Кеңештин жалпы жыйынынын жүрүшүндө депутат Сүйүнбек Өмүрзаков күч түзүмдөрүнүн ардагерлеринин пенсиясын жогорулатуу маселесин көтөрдү.

Ал тактап өткөндөй, бүгүнкү күндө Кыргызстанда күч түзүмдөрүнүн 23 миң пенсионери жашайт, алардын ичинен 12 миңи — ИИМдин (Ички иштер министрлигинин) пенсионерлери.

Өмүрзаков белгилегендей, Кыргызстандын президентинин аркасы менен акыркы жылдары пенсиялар көбөйүп жатат, бирок бул өзгөрүүлөр күч түзүмдөрүнүн ардагерлерине тиешелүү болгон жок.

«Биз бул маселени бир нече жолу көтөргөнбүз, бирок жыйынтык жок. Ардагерлердин эмгегин унутууга болбойт. Бул маселени чечип, аларды колдошубуз керек. Буга чейин Министрлер кабинети комиссия түзгөн, ал өз ишин аяктады, бирок анын жыйынтыгы белгисиз. Комиссиянын ишинин жыйынтыгын жарыялап, пенсияларды жогорулатууну суранам», — деди эл өкүлү.

Өмүрзаков кошумчалагандай, күч түзүмдөрүнүн пенсионерлери коомдук транспортто жүрүү үчүн «Тулпар» системасына кошула албай (картасын ала албай) жатышат, буга байланыштуу ал Министрлер кабинетинен бул маселени чечип берүүнү суранды.