Күйүүчү-майлоочу май боюнча Орусия менен жаңы келишим түзүлдү. Бул тууралуу өкмөт башчынын биринчи орун басары Данияр Амангелдиев журналисттерге билдирди.

Амангелдиев Орусия президентинин Кыргызстанга болгон сапарынын алкагында эки өлкө ортосунда 2026-жылга карата жаңы келишимге кол коюлганын кабарлады.

Келишимге ылайык, Орусия мурда жылына 1 млн тонна күйүүчү май жеткирип келсе, эми 200 миң тоннага көбүрөөк, башкача айтканда, 1 млн 200 миң тонна импорттойт.

Эске сала кетсек, буга чейин Кыргызстанда күйүүчү майдын кору бир айга жетери тууралуу маалымат тараган. Калк арасында күйүүчү майдын жетишсиздиги болушу мүмкүн деген кооптонуу күчөгөн. Кийинчерээк Бишкектеги айрым май куюучу жайларда күйүүчү майга чектөө киргизилип жатканы белгилүү болгон. Ал эми өкмөт бир канча өлкө менен күйүүчү-майлоочу майларды жеткирүү боюнча сүйлөшүүлөрдү жүргүзүп жатканын билдирген.