15-январдагы мониторингдин жыйынтыгы боюнча, Бишкекте абанын булганышы кыйла начарлаганы байкалууда. Абанын сапатынын индекси (AQI) 270дөн 360ка чейинки көрсөткүчтү түзүүдө, бул адамдардын ден соолугу үчүн «абдан зыяндуу» жана «кооптуу» деңгээл болуп саналат.

Дем алуу системасы үчүн өзгөчө кооптуу болгон PM2.5 майда бөлүкчөлөрү негизги булгоочу зат катары калууда. Мындай көрсөткүчтөр учурунда жүрөк-кан тамыр жана дем алуу органдары ооруган адамдар, кары-картаңдар жана балдар өздөрүн начар сезиши мүмкүн.

Мындай күндөрү дарыгерлер мүмкүн болушунча сыртка чыкпоону, терезелерди жабык кармоону жана имарат ичинде аба тазалагычтарды колдонууну сунушташат. Өнөкөт оорусу бар адамдар жана балдар өзгөчө этият болушу зарыл.