Евразия өнүктүрүү банкы (ЕӨБ) Кыргыз Республикасынын үстүбүздөгү жылга карата акча-кредит саясаты боюнча божомолун сунуштады. Банктын талдоочуларынын баамында, Улуттук банк эсептик ченди 2026-жыл бою 11% деңгээлинде сактап калат.

Серепте белгиленгендей, январдагы отурумда жөнгө салуучу орган ченди өзгөрүүсүз калтыруу чечимин кабыл алган. Катаал шарттарды сактоонун негизги фактору катары баалардын динамикасы эсептелет: өлкөдө жылдык инфляция (16-январга карата) 9,4% белгисинде турукташкан. Эксперттер эсептик ченди 11% деңгээлинде кармап туруу инфляцияны белгиленген 5–7%дык максаттуу көрсөткүчкө акырындык менен кайтаруу үчүн зарыл деп эсептешет.

ЕӨБдүн талдоочулары банк секторундагы кырдаалга да көңүл бурушту. Жогорку эсептик ченге карабастан, тутумда өтүмдүүлүктүн жогорулаган деңгээли сакталууда, мындан улам банктар аралык насыя рыногунун (BIR) орточо салмактанып алынган чени 5% белгисине жакын түзүлүүдө.

Эксперттердин пикири боюнча, негизги чендин узак мөөнөттүү туруктуулугу 2026-жыл бою республикадагы инфляциялык күтүүлөрдү ооздуктоо жана макроэкономикалык туруктуулукту камсыздоо үчүн жөнгө салуучу органдын башкы куралы болуп калмакчы.