Таанымал стендап-комик жана «Эмне болду?» (Что было дальше?) оюн-зоок шоусунун алып баруучусу Нурлан Сабуровго Россия Федерациясынын аймагына кирүүгө 50 жылдык мөөнөткө расмий түрдө тыюу салынды. Бул тууралуу россиялык жалпыга маалымдоо каражаттары укук коргоо органдарындагы өз булактарына таянып билдиришүүдө.

Алдын ала маалыматтар боюнча, мындай чечим улуттук коопсуздукту камсыздоо, мыйзамдуулукту сактоо жана салттуу руханий-адеп-ахлактык баалуулуктарды коргоо кызыкчылыгында кабыл алынган. Артист бул тыюу тууралуу Дубайдан Москванын «Внуково» аэропортуна учуп келгенде билген. Паспорттук көзөмөлдөн өткөндөн кийин Сабуровго анын өлкөгө кирүүсүн 2076-жылга чейин чектеген тийиштүү документ тапшырылган.

Медиаресурстар шилтеме берген укук коргоо мекемелеринин материалдарында комиктин ишмердүүлүгүнүн каржылык аспектилери да айтылат. Кеп Россияда тапкан кирешелерин которуу үчүн болжолдуу ортомчулук схемаларын колдонгону тууралуу болуп жатат. Мындан тышкары, Сабуровдун Россиянын аймагында жалпы баасы 60 миллион рублдан ашкан мүлкү бар экени белгиленген.

Учурда Россиянын расмий мамлекеттик органдары жана артисттин өкүлдөрү бул боюнча эч кандай түшүндүрмө бере элек.

Эскерте кетсек, буга чейин ЖМКларда Нурлан Сабуровдун миграциялык мыйзамдарды бузганына байланыштуу «Шереметьево» аэропортунда кармалганы тууралуу маалымат чыккан. Бул окуя учурдагы чечимдин кабыл алынышына негизги себептердин бири болушу мүмкүн экени айтылууда.