Кара-Балта шаарынын мэриясы үй жана кароосуз калган жаныбарларды стерилизациялоого жана эмдөөгө жазылуу башталганын билдирди. Медициналык процедуралар шаар тургундары үчүн толугу менен акысыз жүргүзүлөт.

Бул демилге Кыргыз-Француз экотуризм бирикмеси менен биргеликте «Кумайык» программасынын (кармап келүү, стерилизациялоо, эмдөө, кайра коё берүү) жана Жайыл райондук ветеринария башкармалыгынын алкагында ишке ашырылууда.

Жаныбарлардын ээлерин жазуу атайын байланыш борбору (колл-борбор) аркылуу гана жүргүзүлөт.
«Кумайык» байланыш борборунун номери: 0700 335 449.

Чалып жатканда Кара-Балта шаарынан экениңизди айтып, байланыш номериңизди калтырып, жаныбар тууралуу кыскача маалымат беришиңиз керек.

Жаныбарларды кабыл алуу Кара-Балта шаары, Шопоков көчөсү, 44 дареги боюнча жүргүзүлөт.

Стерилизациялоо менен катар эле шаарда жаныбарларды идентификациялоо өнөктүгү да башталууда. Каалоочулардын бардыгына үй жаныбарларына электрондук чип орнотуу сунушталат.

Чипти орнотуу процедурасы акысыз жүргүзүлөт, жаныбардын ээси чиптин гана баасын төлөшү керек, ал болжол менен 200 сомду түзөт.

Мэрия учурда чип орнотуу ыктыярдуу мүнөзгө ээ экендигине жарандардын көңүлүн бурат. Бирок келечекте, «Жаныбарларды идентификациялоо жөнүндө» Кыргыз Республикасынын Мыйзамынын талаптарына ылайык, бул процедура бардык үй жаныбарларынын ээлери үчүн милдеттүү болуп калат.