Кыргызстандын президенти Садыр Жапаров 1960-1970-жылдары курулган жана авариялык абалда турган бардык мектептер 2028-жылдын сентябрына чейин толук оңдолуп же жаңыдан куруларын билдирди. Бул тууралуу ал Алай районунун тургундары менен болгон жолугушууда айтты.

Мамлекет башчысынын айтымында, бүгүнкү күндө Кыргызстанда 3 миңге жакын айыл бар жана алардын көбүндө мектеп имараттары эскирген. Акыркы беш жылдан бери билим берүү мекемелерин этап-этабы менен модернизациялоо жана жаңыларын куруу иштери жүрүп жатат.

Ошондой эле, тургундар таза суу менен камсыз кылуу көйгөйлөрүн чечүү, бала бакчаларды жана башка социалдык объектилерди куруу жана жаңылоо зарылдыгына президенттин көңүлүн бурушту.

Мамлекет башчысынын аппаратынын маалыматтык камсыздоо бөлүмү билдиргендей, Садыр Жапаров тургундардын башка дагы көптөгөн суроолоруна жооп берди.

Негизги темалардын катарында жол инфраструктурасын өнүктүрүү, анын ичинде Ош — Эркечтам автожолун модернизациялоо жана ички жолдордун абалын жакшыртуу маселелери болду.

Жер ресурстары маселелери өзүнчө блок катары каралды. Жолугушуунун катышуучулары жер тартыштыгы, тилкелерди трансформациялоо жана жайыттарды сарамжалдуу пайдалануу темаларын көтөрүштү. Ошондой эле тарыхый жана маданий мааниге ээ аймактарды сактоо жана жергиликтүү тургундардын пикирин эске албай туруп аларды өздөштүрүүгө жол бербөө зарылдыгы белгиленди.

Диалогдун жүрүшүндө укуктук мүнөздөгү кайрылуулар, анын ичинде сот чечимдерине, укук коргоо органдарынын ишмердүүлүгүнө, социалдык төлөмдөргө жана пенсиялык камсыздоого байланыштуу маселелер айтылды. Алардын айрымдары кошумча изилдөөнү жана укуктук баа берүүнү талап кылат.

Тургундар айыл чарбасын колдоо маселелерин да көтөрүштү. Ирригацияны жакшыртуу, суу ресурстарын натыйжалуу пайдалануу, ошондой эле фермердик чарбаларды өнүктүрүү жана жашылдандыруу маселелери талкууланды.

Мамлекеттик кызмат көрсөтүүлөрдү санариптештирүүгө өзгөчө көңүл бурулду. Президент электрондук сервистерге өтүү негизги документтерди аралыктан алууга мүмкүндүк берип, бюрократиялык жол-жоболорду азайтарын белгиледи. Анын айтымында, документтердин жаңы үлгүлөрү эл аралык стандарттарга жооп берет жана чет өлкөлөрдө таанылат.

Жолугушуунун жүрүшүндө министрликтердин жана мамлекеттик органдардын жетекчилери аймактарга тез-тезден чыгып турушу керектиги жөнүндө сунуш айтылды.

Садыр Жапаров көтөрүлүп жаткан бир катар маселелер жергиликтүү жана тармактык органдардын компетенциясына кирерин жана алар аймактык деңгээлде чечилиши керектигин белгиледи.

Мамлекет башчысы жакынкы аралыкта министрликтердин жана мамлекеттик органдардын жетекчилеринин өлкө аймактарына үзгүлтүксүз чыгууларынын графиги бекитилерин билдирди. Бул чара жеринде иштөөнүн натыйжалуулугун жогорулатууга жана жарандардын кайрылууларын өз убагында кароого багытталган.

Талкуунун жыйынтыгында президент ар бир кайрылууну ыкчам жана объективдүү кароо зарылдыгына басым жасап, тармактык мамлекеттик органдарга бир катар тапшырмаларды берди.

Жолугушуунун аягында Жапаров инфраструктураны өнүктүрүү, жашоо сапатын жогорулатуу жана мамлекеттик кызматтарга жеткиликтүүлүктү кеңейтүү негизги артыкчылыктуу багыттар бойдон кала берерин баса белгиледи.