Жогорку Кеңеш «Расмий статистика жөнүндө» мыйзамга өзгөртүүлөрдү киргизүү боюнча мыйзам долбоорун карап жатат. Документ маалыматтарды чогултуу системасын модернизациялоого жана бюрократияны кыскартууга багытталган.

Мыйзам долбоору президенттин мамлекеттик кызматтын натыйжалуулугун жогорулатуу жана дебюрократиялаштыруу боюнча жарлыгын аткаруу максатында иштелип чыккан. Анын негизги максаты — статистиканы заманбап, так жана жарандар менен бизнес үчүн жеңилирээк кылуу.

Мыйзам долбоорунун негиздеме-аныктамасында белгиленгендей, учурда статистикалык маалыматтарды чогултуу ар кандай мамлекеттик органдар тарабынан көп учурда кайталанат. Бул ишкерлерге жана калкка кошумча жүк жаратат. Жаңы мыйзам долбоору бул ыкманы өзгөртүүнү сунуштайт: кайра-кайра сурамжылоо жана отчет талап кылуунун ордуна, мамлекеттик органдарда буга чейин бар маалыматтарга артыкчылык берилет.

Мындан тышкары, альтернативдүү маалымат булактарын, анын ичинде жеке сектордун маалыматтарын колдонуу сунушталууда. Бул телеком-операторлордун, банктардын, соода тармактарынын, онлайн-платформалардын жана транспорт кызматтарынын маалыматтарын камтыйт. Мындай «чоң маалыматтар» социалдык-экономикалык процесстерди так талдоого мүмкүндүк берет.

Мыйзам долбоору ошондой эле жаңы принципти киргизет — респонденттерге болгон жүктү азайтуу. Бул бир эле маалыматты кайталап чогултууга тыюу салууну жана бар маалыматтарды натыйжалуу пайдаланууну билдирет.

Дагы бир маанилүү өзгөртүү — мамлекеттик органдар ортосунда маалымат алмашуунун милдеттүү системасын түзүү. Бул процессти координациялоо Улуттук статистика комитетине жүктөлөт.

Мындан тышкары, жеке маалыматтарды коргоого өзгөчө көңүл бурулат. Мыйзам долбоору статистикалык маалыматтарды текшерүү, иликтөө же санкция колдонуу үчүн пайдаланууга түз тыюу салат.

Ошондой эле документ статистикалык пландоону тартипке келтирет. Кайталанган программалардын ордуна так структура сунушталууда: орто мөөнөттүү программа, статистикалык иштердин планы жана Улуттук статистика комитети бекиткен график.

Белгилей кетсек, мыйзам долбоору Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинде биринчи окууда кабыл алынган.