Кыргызстанда балдарга жана өспүрүмдөргө болгон мамиле коркунучтуу. Бул тууралуу Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинин жыйынында акыйкатчы Атыр Абдрахматова билдирди.
Ал белгилегендей, Акыйкатчы балдарга карата зордук-зомбулук боюнча маалымат түшкөн учурда арыздын келип түшүшүн күтпөстөн, дароо чара көрөт. Анын айтымында, балдардын укуктарын коргоодогу көйгөйлөрдүн бири балдар эмгеги бойдон калууда.
«Тилекке каршы ата-энелер балдарын Москвадагы 11 жаштагы кыздай болуп, досторуна, туугандарына жумушка жөнөтүшөт. Алар кандай шартта иштешет, психологиялык жактан буга канчалык даяр экени белгисиз. Бул багыттагы изилдөөлөр 2007 жана 2014-жылдары жүргүзүлгөн. Болбоду”,-дейт Атыр Абдрахматова.
Анын айтымында, жазгы талаа жумуштарынын башталышы менен балдардын эмгекке тартылышы көбөйүүдө.
«Мугалимдер социалдык тармактар аркылуу жазышып, анонимдүү түрдө балдар массалык түрдө мектепке барбай, талаада иштешет деп жазып жатышат. Жашы жете элек балдар кайда жана канча саат иштей тургандыгы мыйзамда так жазылган. Биз мониторинг жүргүзүп, коопсуздук стандарттарын жана баланын билим алуу укугун сактоо боюнча методологияны даярдап жатабыз. Акыркы кездери балдарга карата зордук-зомбулук фактыларын эске алганда, жалпысынан өлкөдө балдарга жана өспүрүмдөргө болгон мамиле кооптондурат деп айтсак болот», — дейт Атыр Абрахматова.
