Бишкектин Биринчи Май райондук соту “ТНК “Дастан” ААК башкармалыгынын мурдагы төрагасы Алексей Ширшовдун үй камагындагы мөөнөтүн узартуу чечимин чыгарды. Бул тууралуу 24.kg агенттигине соттон билдиришкен.
Чечим 21-майда кабыл алынганы белгилүү болду, бирок ал бүгүн гана айтылды.
Алексей Ширшовдун үй камагындагы мөөнөтү 26-июлга чейин узартылды.
Эске салсак, Алексей Ширшов коррупцияга шектелүүдө. Ал 9-майда кармалып, бирок кийинчерээк үй камагына чыгарылган. Тергөөнүн версиясы боюнча, Ширшовдун «Аврора плюс» эс алуу борборунун аймагындагы кымбат баалуу кыймылсыз мүлктү мамлекеттин менчигинен мыйзамсыз алып чыгууга тиешеси бар.
Буга чейин президент Садыр Жапаров өзүнүн Фейсбук баракчасына Алексей Ширшов кылмыш жоопкерчилигине тартылбаганын жана ага издөө салынбаганын жазган. Кийинчерээк экс-башкы прокурор, Убактылуу өкмөттүн экс-мүчөсү Азимбек Бекназаров мамлекет башчынын маалыматын четке какты. Анын айтымында, Алексей Ширшовдун үстүнөн төрт-беш кылмыш иши козголгондуктан ал Интерпол аркылуу эл аралык издөөдө жүргөн.
