Кыргызстандын өкмөтү айыл чарба жаныбарларын өлкө аймагынан ташып чыгууга убактылуу тыюу салды. Тиешелүү токтомго Министрлер кабинетинин төрагасы Адылбек Касымалиев кол койду.

Документке ылайык, ири мүйүздүү малды, жылкыларды, койлорду жана эчкилерди (ЕАЭБ ТЭИ ТН 0101, 0102, 0104 коддору) Кыргызстандын аймагынан ташып чыгууга алты айлык мөөнөткө убактылуу чектөө киргизилди.

Бул чечим өлкөнүн азык-түлүк коопсуздугун камсыз кылуу жана азык-түлүк товарларына болгон базар бааларын турукташтыруу максатында кабыл алынды.