Чүй облусунда Бишкек шаарынын тургунун өлтүрүлгөнү аныкталды. Сөөк анын Toyota Land Cruiser Prado унаасынан 100 метр алыстыкта табылган.
Чүй облустук ички иштер башкы башкармалыгынан билдиришкендей, 56 жаштагы О.Т. 2022-жылдын 7-февралынан бери дайынсыз жоголгондордун тизмесинде болгон. 8-февралда Сокулук райондук ички иштер бөлүмүнүн нөөмөт бөлүмүнө айылдардын биринде ээси жок унаа табылганы тууралуу маалымат түшкөн.
Тергөө тобу ээси жок Toyota Land Cruiser Prado үлгүсүндөгү унаанын жанынан 100 метр аралыкта адамдын жансыз денеси табылганын аныкташкан. Буга чейин анын денесинде бир нече бычактан жаракаттар болгон.
Аталган факты каттоого алынып, КРнын Кылмыш-жаза кодексинин 122-беренесинин (Киши өлтүрүү) негизинде кылмыш иши козголуп, тиешелүү экспертизалар дайындалды.
Ошол эле күнү милиция кызматкерлеринин иш-аракеттеринин негизинде кылмышка шектүү жаран кармалды. Шектүү Чүй облусунун 33 жаштагы Т.А. аттуу тургуну болгон. Кармалган адам убактылуу кармоочу жайга киргизилди.
Алдын ала маалыматтар боюнча, адамдардын ортосунда чыр чыгып, анын жүрүшүндө жаран О.Т. бычакталган. Мындан тышкары кылмышка шектүү Т.А жабырлануучуну ферма кызматкерине 30 баш бодо малын берүүгө мажбурлаганы тууралуу маалымат бар. Андан ары өлтүрүлгөн адамдын сарайына келип, 30 буканы жүктөп чыгып кеткен.
Учурда тергөө иштери уланууда.
