Чүй облустук сотунун кылмыш иштери боюнча соттук коллегиясынын 2 судьясы — Улукбек Калыбеков жана Тилек Абдырашитов ири өлчөмдө пара талап кылгандыгы үчүн кармалды. Бул маалыматты бүгүн УКМК ырастады.
Алар менен бирге соттук отурумудун катчысы дагы 2-июль күнү колго түшкөн. Судьялар М.Н. аттуу айыпталуучудан 10 миң доллар талап кылышкан.
«Бирок соттолуучу көрсөтүлгөн сумманы берүүдөн баш тарткандан кийин 6 миң долларга түшүрүшкөн. Акчаны алгандан кийин өз ара бөлүшкөн», — дейт УКМК.
Кармоо учурунда Улукбек Калыбеков унаасын атайын жол кырсыгына кабылтып, качып кетүү айласын көргөн.
Бүгүн Судьялар кеңеши экөөнү кылмыш жоопкерчилигине тартууга макулдук берди.
