Бишкек шаарынын Ленин райондук милициясы дайынсыз болгон 28 жаштагы Максат Эрик уулуну издеп жатат.
Маалыматка караганда, быйыл 16-августта райондук милицияга Д.Э. аттуу жаран кайрылып, дайынсыз болгон 28 жаштагы уулу Максатты издешүүгө жардам сураган. Анын айтымында, уулу 2019-жылы Россияга иштегени кетип, акыркы жолу 2023-жылдын январь айында байланышка чыгып, ошол бойдон дайынсыз болууда.
Аталган факт каттоого алынып, тергөөгө чейинки текшерүү иштери башталган.
Териштирүү учурунда Максат Эрик уулу 2023-жылдын 22-январында Москва — Бишкек аба каттамы менен мекенине учуп келгени белгилүү болгон.
Өзгөчө белгилер: бою болжол менен 170-175 см, арык чырай, чачы кара, узун (ийнине чейин), көзү күрөң.
Милиция Максат Эрик уулуну көргөн-билген жана кандайдыр бир маалыматы бар жарандарды 0312 352 947 же 102 номерине кабар берүүсүн суранат.
Биздин Телеграм каналга катталыңыз
