Жогорку Кеңеш «Туруктуу жана инклюзивдүү өсүүнү өнүктүрүүнүн биринчи программасы» насыялык макулдашуусун ратификациялоо жөнүндө мыйзам долбоорун экинчи окууда жактырды. Документке 2025-жылдын 22-сентябрында Кыргызстан менен ОПЕКтин Эл аралык өнүктүрүү фондунун ортосунда кол коюлган.

Макулдашуунун алкагында Кыргыз Республикасы беш жылдык жеңилдетилген мезгилди эске алуу менен, жылдык үстөгү 1,25% болгон 30 миллион долларды 20 жылдык мөөнөткө алат.

Каражат «Кыргызнефтегаз» ААКна төрт жылдык жеңилдетилген мезгил менен, жылдык үстөгү 1% болгон бюджеттик насыя түрүндө 8 жылга берилет. Финансы министринин орун басары Нурбек Акжоловдун айтымында, бул каражаттын эсебинен компания өндүрүштү модернизациялап, мунай продуктуларынын импортунун көлөмүн азайта алат. Бул өз кезегинде өлкөнүн экономикасына оң таасирин тийгизет.