Кыргызстандык «Качкын» тасмасы Бангалордогу (Индия) эл аралык кинофестивалга катышат. Бул тууралуу Кинематография департаментинен билдиришти.

Кинофестиваль 1-8-март күндөрү өтөт.

Тасманы режиссер Дастан Жапар Рыскелди тарткан. Ал «Атанын керээзи», «Акыркы көч» тасмалары менен таанымал.

Белгилей кетсек, «Качкын» тасмасынын эл аралык бет ачары 2024-жылы октябрда Бусандагы (Корея) эл аралык кинофестивалда болгон.

Жакында эле бул тасма Везулдагы (Франция) Азия тасмаларынын эл аралык фестивалында үч сыйлыкка татыды: калыстар тобунун атайын сыйлыгы; адам сатуу маселеси чагылдырылганы үчүн берилген “Марк Хааз” сыйлыгы; “Гиме” атындагы улуттук Азия искусствосу музейинин башкы сыйлыгы жана айкелчеси.