Бүгүн, 31-мартта өлкө башчы Садыр Жапаров Тажикстандын Худжанд шаарына иш сапары менен барды. Бул тууралуу президенттин басма сөз кызматы кабарлады.
Аны Худжанд эл аралык аэропортунан Тажикстандын президенти Эмомали Рахмон тосуп алды.
Аталган шаарда Кыргызстандын, Тажикстандын жана Өзбекстандын мамлекет башчыларынын үч тараптуу саммити өтөт. Анда аталган өлкөлөр ортосунда мамлекеттик чек аралардын кесилишкен чекити жөнүндө келишимге кол коюлат. Ошондой эле, үч өлкөнүн президенттеринин биргелешкен билдирүүсү кабыл алынат.
Мындан тышкары, мамлекет башчылары онлайн форматта чек аралар кесилишкен чекитте орнотулуучу мемориалдык тактанын ачылыш аземине катышышат.
