Президент Садыр Жапаров Шанхай кызматташтык уюмуна мүчө өлкөлөрдүн башчыларынын саммитине катышуу үчүн Астанага (Казакстан) иш сапары менен барат. Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.
Сапар 3-4-июль күндөрү болот. Саммитте ШКУга мүчө өлкөлөрдүн башчылары уюмдун алкагында кызматташууну, аймактык жана эл аралык саясаттагы маселелерди талкуулашат. Жолугушуунун жыйынтыгында Астана декларациясына кол коюлат.
ШКУнун алкагында Садыр Жапаров Кытайдын төрагасы Си Цзиньпин жана Монголиянын президенти Ухнаагийн Хурэлсух менен жолугушуу өткөрөт.
