2-майда Сузак районунун Жерге-Тал айылында “Урааным Манас” аттуу маданий иш-чарасы учурунда болгон окуянын келип чыгуу себептерин иликтөөнүн жыйынтыгы чыкты. Бул тууралуу президенттин маалымат кызматы билдирди.
Анда иш-чарага райондогу 2 миң 878 окуучу жана 18 мектептин 341 мугалими катышканы, алардын коопсуздугун камсыздоо боюнча зарыл чараларды көрбөгөндүгү белгиленген.
- Облустук, ошондой эле райондук ички иштер органдарынын жетекчилери тарабынан жүктөлгөн милдеттерин так аткарган эмес. Алардын билим берүү мекемелери, райондук жана облустук администрация менен маалымат алмашуусу начар болгон;
- Жергиликтүү өз алдынча башкаруу органдарынын жетекчилери “Урааным Манас” сынагын өткөрүүнүн конкреттүү датасы жөнүндө кабардар болгон эмес;
- Сузак райондук акимиаты акциянын датасын телефон аркылуу кабарлаган;
- Жол кыймылынын коопсуздугун камсыздоого 2 гана инспектор тартылган;
Комиссиянын сунушу менен Билим берүү министрлигинин жана жергиликтүү өз алдынча башкаруу органдарынын 21 кызматкери тартиптик жоопкерчиликке тартылып, анын ичинен 6 адам ээлеген кызматынан бошотулду.
Эскерте кетсек, 2-майда Сузактын Катмы жайлоосунда «Манас айтуу» боюнча сынак учурунда балдарды Porter тебелеп кеткен. Анда 29 бала жабыркап, 18и ооруканага түштү. Оор абалдагы 10 бала Жалал-Абаддан Бишкекке которулду.
Иш-чара учурунда коопсуздук маселесин өз деӊгээлинде камсыздабай жана алдын алуу иш-чараларын так жүргүзбөгөндүгү үчүн жалпы 12 милиция кызматкери тартиптик жазаларын алышты.
