Токмоктогу авиакырсык фактысы боюнча комиссия түзүлдү. Бул тууралуу Жогорку Кеңештин “Ишеним” фракциясынын жыйынында жарандык авиациянын жетекчиси Александр Настаев билдирди.
Анын айтымында, учак кечээ машыгуу учуу учурунда кырсыкка учураган.
«Бул кичинекей спорттук жана машыгуучу учак. Учакта эки адам — курсант жана инструктор болгон. Учак конуу тилкесинен 150 метр бийиктикте жерге кулап түшүп, күйүп кетти. Курсанттын абалы оор, буту сынган. Инструктордун жаагы сынган. Алар ооруканага жеткирилген, алардын өмүрүнө коркунуч жок. Анын себептерин иликтөө үчүн комиссия түздүк. Мүмкүн техникалык себептерден болушу мүмкүн», — деди Александр Настаев.
Буга чейин 2015-жылы чыгарылган Bristell NG-5 учагы бир күн мурун Токмоктогу машыгуу аэродромуна кулап түшкөнү маалымдалган. Эки адам ооруканага жеткирилген. Транспорт прокуратурасы тергөөгө чейинки текшерүү иштерин жүргүзүүдө.
Биздин Телеграм каналга катталыңыз
