УКМК тарабынан «массалык башаламандыктар» беренеси боюнча кармалган активист Зарина Төрөкуловага сот өкүмү чыкты.
Зарина Төрөкулованын иши Бишкектин Биринчи май райондук сотунда каралып, өкүм 16-январда угузулду. Сот аны Кылмыш-жаза кодексинин 41-беренесинин 3-бөлүгү жана 278-беренесинин 3-бөлүгү (массалык башаламандыктарга чакырыктар) боюнча күнөөлүү деп таап, 5 жылга эркинен ажыраткан. Ошол эле учурда ага 3 жылдык пробациялык мөөнөт белиглеп, эркиндигинен ажыратуу жазасын бошоткон.
Эскерте кетсек, активист Зарина Төрөкулова 2023-жылы сентябрь айында кармалып, камакка алынган. УКМКнын маалыматы боюнча, Төрөкулова өзүнүн «Фейсбуктагы» баракчасына Кылмыш-жаза кодексинин 278-беренесинин 2-бөлүгүнө (массалык баш аламандыктар) туура келген чагымчыл маанайдагы билдирүүлөрдү жарыялаган деген шек менен кармалган.
