Ырчы, акын жана активист Аскат Жетиген УКМК тарабынан кайра кармалды.
Жактоочу Венера Буудайбекова «Азаттыкка» билдиргендей, Аскат Жетигендин 15-марттагы жасаган видеокайрылуусу боюнча экспертизанын жыйынтыгы чыгып, анын негизинде акынга «массалык баш аламандыктарга чакырыктар» беренеси менен дагы бир эпизод боюнча кылмыш иши козголгон. 15-марттагы видеокайрылууда Аскат Жетиген бийликти сындап, каарып-сөккөн.
Акын Биринчи май райондук сотуна жеткирилип, бөгөт чарасы каралганы турат.
Эскерте кетсек, УКМКнын кызматкерлери 16-мартта Аскат Жетигенди Кочкордон кармап, Бишкекке алып кеткен. Анда Аскат Жетиген 2022-жылы козголгон кылмыш ишинин алкагында кармалганы кабарланган. УКМК ага «бийликти басып алууга чакырык жасоого» айып таккан.
Акын 48 саат камакта болгондон кийин 18-мартта Бишкектин Биринчи Май райондук соту тарабынан аны эч жакка кетпөө тилкаты менен бошотулган.
Аскат Жетиген 2021-жылдан баштап азыркы бийликтин аракеттерин кескин сындаган видеокайрылууларды чыгарып келген. Анын ичинде кумаркананы иштетүү, тууну өзгөртүү боюнча каршы пикирин билдирип, активисттердин камакка алынышын жана маданият тармагындагы реформаларды айыптаган.
