Ысык-Көл районунун мамлекеттик нотариалдык кеңсесинин нотариусу коррупцияга шектелип кармалды. Бул тууралуу УКМК билдирди.

Текшерүүнүн жүрүшүндө 50 жаштагы К.К.К. нотариалдык кызматтар үчүн накталай акчаны системалуу түрдө жеке өзү алып турганы аныкталган. Алынган суммалар белгиленген мамлекеттик тарифтерден жогору болгон.

Мыйзамдарга ылайык, мамлекеттик алым нотариалдык иш-аракет жасалганга чейин банктык төлөмдөр аркылуу накталай эмес түрдө гана төлөнүшү шарт.

Иликтөөдө нотариалдык аракеттердин татаалдыгына жараша мыйзамсыз алынган каражаттардын суммасы миң сомдон 20 миң сомго чейин жеткени такталган. Учурда козголгон кылмыш ишинин алкагында тергөө иштери улантылууда.