Ысык-Көлдүн Жети-Өгүз районунда тоо аркарын аткан браконьерлер кармалды. Бул тууралуу облустук милициядан билдиришти.
Маалыматка караганда, алар 4-мартка караган түнү «Чаар-Арча» экологиялык көзөмөл-өткөрмө пунктунан кармалган.
Мыйзамсыз аңчылык кылгандар «Тойота Фораннер» унаасы менен баратканда токтотулган. Унааны 47 жаштагы Барскоон айылынын тургуну (У.А.) айдап бара жаткан. Анын жанында 35 жаштагы айылдашы (Ж.И.) болгон. Текшерүү учурунда унаадан аркардын бүтүн эти, эки мылтык жана ок-дарылар табылган.
Кармалган жарандардын мылтыктарга уруксат кагазы болгон, бирок аңчылык кылууга лицензиясы жок болуп чыккан.
Аталган факт милицияда каттоого алынып, материалдар юридикалык баа берүү үчүн тергөө кызматына өткөрүлүп берилди.
